طبعا زي ما كلنا عارفين من قديم الزمان كان الإنسان بيتعامل بالمقايضة يعني
حاجة قدام حاجة
أو حاجات قدام حاجات
أو حاجات قدام حاجة
أو حاجة قدام حاجات
و طبعا كل واحد حسب إحتياجة لكن بعد كدة إحتاج الإنسان لمعيار للحاجات دي علشان محدش يضحك علي حد فمثلا الحاجات اللي بتتقاس بالطول عملولها مسطرة بتقيس بالسنتيمتر أو البوصة و الحاجات اللي بتتوزن عملولها ميزان بيوزن بالرطل أو الكيلو و هكذا و لما نحب نقيس حاجة بالطول علمونا في المدارس زمان لو الطول متقاس بطرق مختلفة لازم نوحد وحدة الطول يعني ماينفعشي نقارن حاجة متقاسة بالبوصة بحاجة متقاسة بالسنتيمتر لازم الحاجتين ياإما بالبوصة الإثنين أو بالسنتيمتر الإتنين يعني بإختصار نوحد وحدة القياس و كذلك الوزن ماينفعشي حاجة موزونة بالرطل تتقارن بحاجة موزونة بالكيلو لازم الإثنين ياإما يتوزنوا بالرطل ياإما يتوزنوا بالكيلو يعني برضه بإختصار نوحد وحدة الوزن علشان المقارنات تبقي مضبوطة ..... و الكلام ده لو إتنفذ صح مش هايكون فيه مشاكل بين الناس و لا بين الناس و الحكومة و لا بين الدول ..... يعني بإختصار كل واحد هايبقي عارف حقه و اللي ليه و اللي عليه
الدول برضه بتوزن و تكيل و تقيس
طبعا الدول بينها و بين بعضها بتوزن و تكيل و تقيس لكن الميزان و المكيال و المسطرة اللي بتوزن و تكيل و تقيس بيهم لدوله أكبر منها غير اللي بتستخدمهم مع دوله راسها براسها غير اللي بتستخدمهم مع دوله راسها تحت شويه عن راسها و طبعا غير اللي بتستخدمهم مع دولة راسها تحت خالص و طبعا ده إستعباط دولي رسمي و علشان يزوقوه قالوا عليه الكيل بمكيالين و طبعا هما مش مكيالين دول مليون مكيال و كلنا شفنا الكلام ده بين الدول و حتي علي مستوي الأمم المتحدة
المسطرة الكاوتش المطاطة
و مع تقدم التكنولوجيا الدول المفترية عملت لنا حاوي و إخترعت مسطرة كاوتش مطاطة منكمشة حسب الحاجة و قرب ياجدع بص شوف لا سحر و لا شعوذة شفت الشبر دة أهة إتنين و عشرين سنتي بص يافندي بص يابيه بصي ياهانم من غير ما نعمل حاجة بص المسافة بين راسك و رجلك برضه إتنين و عشرين سنتي يعني طول سيادتك شبر واحد بس و ركز معايا بص و بصي الصرصار اللي ماشي ده طوله برضه إتنين وعشرين سنتي يعني شبر برضه يعني سيادتك طول الصرصار و هكذا تتمط المسطرة و تنكمش حسب رغبة اللي ماسكها و كله علشان الناس تحس إن كله معمول حسابه و سيلة القياس واحدة و اللي مش عاجبة يخبط راس أهله في الحيطة اللي قايسينها بنفس المسطرة
